"Horch Karl, solle mer
net an Oschdere e paar Leit eilaade?"
"Glei e paar - an wen hosch dann gedenkt?"
"Vielleicht's Lehmanns?"
"Bisch ve'riggt, de Max un sei Fraa - die hämmer grad no gfehlt an denne
Daach. Do deescht nix anneres heere vum Max wie vun seim Prozess geche de
Maier.''
"Was forn Prozess?"
"A wääscht dann du des net - dem sein Kerschebaam hott doch uff
de Grenz vun denne ehrm Gaade gschdanne un do hott de Meier uff seinre Seit
immer de Kersche runnergmacht. Un wie de Max im ledschde Frihjohr - 's war
an de Oschdere - gsehne hott, dass driwwe meh Bliehde ware, hott er vor Zorn
de Baam umghaache."
"Weje denne, paar Kersche due die e ganz Johr prozessiere?"
"Nee - wechem Meier seim Gaadeheisel, do is de Baam druffgfalle un hotts
zammegedriggt.
Un loss mer jo die Irene fort mit ehre Krankegschichte. Die kannsch jo nimmi
frooche, was hoschen - die musch frooche, was hoschen net? Wääscht
no ledschd Johr hott doch die kee Oschdereier esse kenne weje ehrm Kolleschderin.
Awwer wie se des verzählt hott, hott se dodebei e hallwi Flasch Eierlikeer
gsoffe. Wääsch's noch? Un was mer heit no schdingd, wenn ich draadenk,
des isses Fritzel - denne ehrn Enkel. Der Bankert hott mer doch ledschd Johr
beinm Oschdereiersuuche de ganze Gaade zerdrambeld, wu ich schun
eigsäät ghat hab. Un hinnerher hott de Irene selbschd nimme gwisst,
wu se de Eier verschdeggelt hott. Erscht ledschd im Herbschd hab ich no paar
Oschdersache rumgschoord."
"Also Karl, du määnscht, mer solles losse. Bloos domit du die ganze
Feierdäg widder vor de Glozze hänge kannscht?"
"Babbel net.''
Oschdersunndaach schellts:
"Nee, was e Freed -s Lehmanns.Die Oschderiwwerraschung is eich awwer gelunge
- wergglich. Des is lieb vun eich, uns widdermool zu bsuche. Un's Fritzel
is aach debei - mei, was is de Buu gewachse."
"Haja, der wollt u'bedingd mit, der will doch widder Oschdereier suuche in
eierm Gaade.''
"A jezzert kummt schun rei un erschdemool, Freehliche Oschdere!"
|
|
,,Die, wu mer net eilaade
duud,
bleiwe äm no lang net vum Hals!"
|
hier um in das Hauptmenü
zu gelangen !
