Zwä Mensche dun im Barredies
Sich brav e(r)nähre vun Gemies.
Uff ä(n)mol awwer saacht die Schlang:
"Is aich vorm Obscht dann wärklich bang?
Dodra(n) - ehr kännen ruich mär glaawe -
Därf nät de Herrgott bloß sich lawe!"

Ruckzuck, do wars Ve(r)bott ve(r)gesse,
En Abbel samt 'm Grutze g'fresse.
Zwar dut's de Hunger nät ganz stille,
Doch's langt, fär naggich sich se fihle.
Drum gäbbt's en Schorz aus Feicheblädder
Vum Herrgott - un e Dunnerwädder:

"Ehr sollden beim Salat doch bleiwe!
Glei dut moin Engel fort aich treiwe,
Weil däss die Erbsind is gewässt!"
So hait mer's in de Biwel läst.
Die Schlang hot dreggich noch gelacht
Un dann sich ausm Staab gemacht.

Aus:
Albert H. Keil, Hunde vor de Herze,
© 1997 by Verlag PfalzMundArt, Dirmstein, ISBN: 3-921-395-34-8

Von Albert H. Keil überarbeitet
und in Mußbacher Mundart übersetzt

Seit fuchzich Johr mit Schuh un Schlabbe
duuscht schunn uff däre Welt rumdabbe.
Noch fihlscht dich jung un recht gewärzich,
du wirkscht uff ämm wie A(n)fang värzich!

Will schaffe mer de Räscht vum Läwe,
braucht G'sundheit mer uff Dauer äwe.
Drum, wann du kinftich trinkscht un ischt:
Denk dra(n), dass d' jetzt fuchzich bischt!

Beischt in e Rumpsteak mit de Zäh(n)
un kauscht un kauscht un's wärd nät klä(n),
noot sinn die dritte Zäh(n) in Sicht:
Denk dra(n), dass d' jetzt fuchzich bischt!

Schenkscht du de Woi därr statt ins Glas
grad midde in die Blummevas,
do braugscht e Brill, nät bessres Licht:
Denk dra(n), dass d' jetzt fuchzich bischt!

Wann du en Kamm nämmscht in die Hand
un spierscht am Kopp kaum Widerstand,
weil du do owwe nimmi dicht:
Denk dra(n), dass d' jetzt fuchzich bischt!

Bohrscht du in doiner Nas mol rum
un bleibt de Finger noochher krumm,
dann hoscht du jo velleicht schunn Gicht:
Denk dra(n), dass d' jetzt fuchzich bischt!

Dut änner "Rindviech" zu därr saache,
reech dich nät uff un schon doin Maache,
schunscht krumbelscht Falde därr ins G'sicht:
Denk dra(n), dass d' jetzt fuchzich bischt!

Siggscht imme Sexfilm Pornobilder,
wärrscht awwer trotzdem nimmi wilder
un määnscht: "Was issen däss fär'n Mischt?"
Denk dra(n), dass d' jetzt fuchzich bischt!

Zeicht därr doi Fraa so dann un wann,
was se im Bett noch leischde kann,
bloß du merkscht, dass bei där nix muckt sich:
Saach ä(n)fach: "Fraa, ich bin halt fuchzich!"

Däss wär's, was ich zu saache hett.
Halt schä(n) dich dra(n), ve(r)gesses nät!
Däss helft därr, dass die Welt sich wunnert:
In fuchzich Johr wärrscht nämlich hunnert!