Die Palz mit ehre herrlich Pracht,
mit Orte, wo mer Urlaub macht,
die is fer mich wie en Gewinn -
e Gligg, dass ich en Pälzer bin

Bunte Blume, griene Wälder,
Schdolzes Wild un braune Felder,
uff Schusters Rappe uff de Walz -
des is unser schäänie Palz!

Rewe schbrieße iwwerall,
de Briegel is en Schdar am Ball,
Pälzer leit - des is doch wohr -
schdechen immer klar hervor!

Burge, Schlösser, Deeler, Höhe,
alles gibt's bei uns zu sehe,
guude Mensche mit viel Sinn -
e Gligg, dass ich en Pälzer bin! 

Feschde fei're, Schoppe mache,
uuze, ulke un viel lache,
Kogelores un aach Schbaß -
mer Pälzer sin e klorie Rass'! 

Ja sogar de Petrus schnallt's!
un er ruft aus vollem Hals:
Gäb's die Palz net uff de Erd' -
wär die Welt die Hälft' nor wert!

Falls ich in de Himel kumm,
redd' ich garnet lang drumrum.
Ich saach em Herrgott klipp un klar:
Danke, dass ich en Pälzer war!